ល្បែងតាមអនឡាញ មួយចំនួនធំ នៅក្នុងខណ្ឌដូនពេញ ត្រូវបាន អាជ្ញាធរទុកសម្រាប់ចិញ្ចឹមឆ្នាំងបាយ!!!

រាជធានីភ្នំពេញ: ទីតាំងល្បែងអនឡាញបច្ចុប្បន្ននេះ ត្រូវបានគេមើលឃើញថា បានកើតមានស្ទើរតែគ្រប់ទីកន្លែង ក្នុងខណ្ឌដូនពេញ ជាពិសេសគឺទីតាំងបនល្បែងពីរកន្លែង ភ្នាល់ចាក់បាល់ បៀការ៉ាត់ មាន់ជល់ហាយឡាយ ប្រភេទ casino និងប្រភេទល្បែងផ្សេងៗទៀត។ ទីតាំងទី០១ ស្ថិតនៅផ្ទះល្វែងគ្មានលេខ ផ្លូវ១៥៤ ក្នុងសង្កាត់ផ្ស៉ារកណ្តាលទី១ ខាងជើងវត្តឧណ្ណាលោម និងទីតាំងទី០២ ផ្ទះគ្មានលេខ ផ្លូវ៧០ សង្កាត់ស្រះចក ខណ្ឌដូនពេញ។ ដោយមានអ្នកលេងហ៊ោកញ្ច្រៀវអឺងកង ប៉ុន្តែសំឡេងទាំងនោះមិនបានប៉ះពាល់ដល់ត្រចៀកអាជ្ញាធរនិងសមត្ថកិច្ចនោះឡើយ។

គួរបញ្ជាក់ថា ដើម្បីធានាឲ្យជនគ្រប់រូប និងសង្គមទាំងមូលមានសុវត្ថិភាពយ៉ាងល្អប្រសើរ ជីវភាពរុងរឿងនិងសុខដុមរម្យនា រាជរដ្ឋាភិបាលកម្ពុជាបានសម្រេចដាក់ចេញ នូវគោលនយោបាយ<<ភូមិ-ឃុំ-សង្កាត់-មានសុវត្ថិភាព>>ចំនួន៧ចំណុច ដែលក្នុងនោះក៏រួមមាន គ្មានបទល្មើស លួច ឆក់ប្លន់ គ្រឿងញៀន ល្បែងស៊ីសងខុសច្បាប់និងបទល្មើសគ្រប់ប្រភេទ។ដូច្នេះប្រសិនបើអាជ្ញាធរ ក៏ដូចជាសមត្ថកិច្ចមូលដ្ឋាន មិនព្រមធ្វើការបង្ក្រាបល្បែងស៊ីសងនៅក្នុងមូលដ្ឋានរបស់ខ្លួនទេនោះ គឺបានបង្ហាញយ៉ាងច្បាស់ថា អាជ្ញាធរនិងសមត្ថកិច្ចមូលដ្ឋានទាំងនោះ ពុំបានអនុវត្តនូវគោលនយោបាយដែលរាជរដ្ឋាភិបាលបានដាក់ចេញនោះទេ។

ពាក់ព័ន្ធនឹងទីតាំងល្បែងស៊ីសងទាំង០២កន្លែងខាងលើនេះ

លោក សុខ ពេញវុធ អភិបាលខណ្ឌដូនពេញ ក៏ដូចជាលោកទៀង ច័ន្ទសា អធិការនគរបាលខណ្ឌដូនពេញ ធ្លាប់បានថ្លែងមកកាន់អង្គភាពសារព័ត៌មានពេញចិត្តមេឌា ថា ចំពោះបនល្បែងទាំង០២ទីតាំងខាងលើនេះ លោកនឹងចាត់ពីធានការ

បង្ក្រាបនិងចាត់ការតាមផ្លូវច្បាប់ ខណៈពេល មានពលរដ្ឋធ្លាប់បានរាយការណ៍រាប់ភ្លេច និងសារព័ត៌មានក្នុងស្រុកធ្លាប់បានចុះផ្សាយជាច្រើនលើកច្រើនសារក៏ដោយ ក៏គេមើលឃើញថា

ទីតាំងល្បែងស៊ីសងទាំងពីរកន្លែងនេះ នៅតែអាចដំណើរការបានយ៉ាងរលូន មហាជនក៏ដូចជាពលរដ្ឋ ដែលរស់នៅជិតទីតាំងល្បែងស៊ីសងខាងលើ បានដាក់ការសង្ស័យថា បើមិនមានការត្រូវរ៉ូវគ្នា អាជ្ញាធរក៏ដូចជាសមត្ថកិច្ចក្នុងមូលដ្ឋាន មិនបើកភ្លើងខៀវឲ្យ ទីតាំងល្បែងស៊ីសងខាងលើនេះ បើកដំណើរការយ៉ាងរំភើយដូច្នេះទេ?

ពលរដ្ឋនិងមហាជនជាច្រើន ស្នើសុំដល់ឯកឧត្តម ឃួង ស្រេង អភិបាលរាជធានី និងឯកឧត្តមឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ សូមមេត្តាមានវិធានការ ដាក់បទបញ្ជា ដល់មន្ត្រីក្រោមឱវាទ ចុះបង្ក្រាបទប់ស្កាត់ ទីតាំងបនល្បែងស៊ីសងខាងលើនេះផង៕

បើយោងតាមច្បាប់នៃការបង្ក្រាបល្បែងសុីសង ជំពូក៣ ទោសបញ្ញត្តិ បានចែងក្នុងមាត្រា ៤ ជនណាលេងល្បែងសុីសង ជននោះត្រូវផ្តន្ទាទោសពិន័យជាប្រាក់ពីមួយមុឺនរៀល(១០.០០០) ដល់ ប្រាំមុឺនរៀល (៥០.០០០) ឬដាក់គុកពីមួយថ្ងៃដល់មួយខែ។ ក្នុងករណីមិនរាងចាល ត្រូវផ្តន្ទាទោសពិន័យជាប្រាក់ពីប្រាំមុឺនរៀល(៥០.០០០)ដល់ប្រាំសែនរៀល(៥០០.០០០) និងដាក់គុកពីមួយខែដល់មួយឆ្នាំ។

មាត្រា៥ ត្រូវផ្តន្ទាទិសពិន័យជាប្រាក់ពីប្រាំលានរៀល(៥.០០០.០០០)ដល់ម្ភៃលានរៀល(២០.០០០.០០០)និងដាក់គុកពីមួយឆ្នាំដល់ប្រាំឆ្នាំ ចំពោះអ្នកបើកកន្លែងលេងល្បែងសុីសង អ្នកកាន់កាប់ល្បែងសុីសង អ្នកចាត់ចែងនិងភ្នាក់ងារសុីសង។ ក្នុងករណីពុំរាងចាលត្រូវផ្តន្ទាទោសពិន័យជាប្រាក់និងដាក់គុកខាងលើជាអតិបរមា។ នឹងមាត្រា ៦-៧-៨-៩-១០ និង១១ទៀតផង ….